給有心攪會的人的善意忠告

我一直都話,玩除左要玩得安全,更加要玩得低調,什麼上電台,上電視,上雜誌報紙做訪問,又認屎認屁,的確係可以一下子達到高效率嘅宣傳效果,吸引到好多無接觸過又好好奇嘅男女去加入,但係大家無注意嘅係,到底係認屎認屁嘅背後有幾多係講一套做一套同換嚟幾多無見光嘅「不幸事件」?

我地成日都話「若要人不知,唔好太低B」!十年前發生過嘅肥皂劇,造就左SBC嘅誕生,十年後肥皂劇又再次上演,歷史不斷重複,當年錯嘅,現今只係變本加厲,係呢個圈子日子淺嘅人唔知,就唔代表事情無發生過,只係好多人都採取事不關己,己不勞心嘅態度。規矩可以不斷改,不斷加直到走火入魔,即使改到幾嚴謹都好,一樣會有涵蓋唔到嘅地方,就係人嘅品格。即使你講到天下無敵都好,去到尾,一切源於「尊重」,係一個性派對組織入面,每位都係成年人,有一定程度嘅常識,知識,同生活智慧。每位都係想有個嘅輕鬆、安心又好玩嘅環境,「Less is more」係一種管理態度,唔需要吹噓自己有幾巴閉,有幾嚴謹。啲人要唔自律,俾你有一千萬條規矩都只係形式。

發生嘅事情本身好似完全唔關我事,但係咁多年嚟(由我接手SBC開始),即使我幾唔八卦都好,都總係會有信息從不同渠道走入我耳仔。由我當八卦聽,聽完就算,到有人借故接觸我,challenge我,起我底,揾我訴苦等等等等。我當時心諗:「玩咋喎,你有你玩,我有我玩,河水不犯井水,駛唔駛呀?傻的嗎?」

再之後暗中中傷,對SBC不盡不實嘅歷史,又有啲九唔搭八嘅人扮想入會同我接觸,又要”教導”我:「唔係咁傾女仔架~~~」。性派對唔好話係香港,係全世界都唔係受大眾所容易接受嘅一個生活態度,仲要「打破傳統」,玩高調?我又心諗:「攪上市咩?」

想高調,但又要威又要戴面具,其實我想話有啲肉酸。我一直都謝絕任何媒體嘅訪問,因為我有正職,啲會員有正職,我地只想有個後樂園可以輕鬆下玩下,唔想冒不必要嘅風險。我作出嘅決定,影響嘅唔止我一個,為自己好勝嘅心,揾會員嘅身份安全嚟博、唔好好保存會員資料、拍人片仲要”唔小心”流左出嚟….仲有太多……唉~~~事情聽一次可能係誤導係虛構,當我接掌左呢六七年嚟,不斷有相同或類似嘅事情,從唔同嘅人身上發生(有我認識同唔認識嘅人),我估有少少智慧嘅人都應該知道有啲問題啦,加上好多仲係當事人而唔係傳聞。

我一向都唔鍾意八卦個會以外嘅野,亦唔鍾意將個D八卦帶入個會,更加唔想批評其他人,令人覺得我地抽人水。但如果涉及SBC會員,甚至整個同類型組織嘅聲譽,即使我幾唔鍾意公開表達意見,都應該起碼俾大家知道我對某啲事嘅睇法。最起碼通過咁樣,可以俾人了解到我以往對會嘅一啲堅持,對呢個後樂園嘅管理態度,對性派對呢類組織嘅見解。

好多人會嫌我太低調,的確可能係過份低調咗少少(呢點我承認係懶嘅),導致好多人都揾唔到SBC,「造成好多人嘅不幸」(大家講笑啫),我會嘗試做多少少架啦。不過,低調唔代表差,少人揾到並唔代表唔存在,有緣份有心嘅,以今時今日資訊發達嘅年代,邊可能揾我哋唔到丫,其實呢個圈子好細架咋!想當年我入SBC之前都知道晒有邊啲其他相同組織啦,好多已經無左,好多歷史悠久,比SBC更早好多年出現添,我入SBC唔係因為呢度最好,只係我花咗一段日子去留意,去嘗試了解,直到我發覺有可能啱傾啱咀形嘅人,先選擇入會。

最後我想講,攪活動嘅人嘅本質同品性好重要,我好欣賞經過咁多年之後,終於有人有勇氣,行出嚟面對「強權」,將冰山一角嘅事件寫出嚟,總算叫做行出咗一步,希望佢喚醒啲幪在鼓裡嘅人,同樣俾到啲勇氣其他受傷害過嘅人行出嚟。雖然事情未必會有滿意嘅結果,亦未必短時間內得到釋懷,但起碼俾人知道”you are not alone”。

而我地作為同類型嘅組織,一直堅持維繫一個care-free同要玩得低調嘅後樂園,希望啲人有心真係想參加任何一個組織抑或群組,都應該花多少少時間去了解,包括我哋呢個群組。狗沖去加入我一向都唔贊成,我哋會網上嘅資料都叫寫得好詳盡下,咁都唔去睇下,了解下,食快餐文化真係去到一個咁嘅地步?如果係,就真係好可悲。

我講咁多,咪以為我講到自己係聖人一樣,我亦有好多缺失,但玩,都要有個品。但我希望他朝一日,我唔會無品到被千夫所指嘅階段。

最後我有一番說話分享俾攪緊會,或者未來想攪會嘅人….

「當攪會變成你生活嘅全部,就係你走火入魔嘅時候。當你用瘟女嚟維繫你嘅”王國”,你就係虛耗緊你人品嘅時候。當你嘗試用更多嘅”規條”去”守護”一個本意係俾人輕鬆自在玩嘅後樂園,就係話俾你聽距離呢個後樂園本意越來越遠,同組織入面啲人自律有問題嘅時候。當你自以為自己係攪會攪得最好嘅時候,要記住唔好自吹自擂,將好勝沖昏咗頭腦,其實無人同你鬥緊,無人同你鬥又何來最呢?當你擁有一身好本領,以為係女都走唔出你嘅手指罅,其實一切都係過眼雲煙。當你以為做過啲咩事未必有人知,咁你就係太天真太傻,上得山多終遇虎呀。當你做得幾唔啱,都總會有人撐你嘅時候,唔好沾沾自喜以為又過到骨,你應該感恩,真心同過去受傷害過嘅人道個歉,然後繼續你嘅王國,繼續歌舞昇平。當你覺得自己好偉大為饑民服務,其實你自己都係一個饑民,只係大家信任你,覺得你有時間,有能力,有誠信同有凝聚力而已。」