唔好錯過「叔•叔」

今時今日好多人唔係睇電視盒就係Netflix,疫情半年嚟,好多大片都被迫改變上映日期。

好多人同我講,話港產片、劇情片個啲都唔駛去戲院睇啦,我曾經都咁覺得過,不過睇下同邊個去睇啦。有啲人鍾意自己一個人去睇戲,我應該唔屬於呢一類人。

一聽片名「叔•叔」,我就即時諗返起圓圓成日咁樣叫我,叫到老晒,所以我特別留意到呢套片。

男同嘅題材其實已經唔係新鮮事物,上咗年紀嘅男同係就係再specific啲,咁到底有咩令佢咁突出呢? 純粹玩Gimmick?

放響我面前有「金都」同「叔•叔」,到底睇邊套先好呢?最後我揀咗後者,因為我好好奇個導演會點樣處理呢一個咁偏咁冷門嘅題材。

結果係,呢幾十蚊簡直值回票價。

如果用「唯美」同「無奈」去形容呢套戲,唔知大家會唔會覺得我誇張咗。

我好欣賞導演處理成套戲嘅手法。有別於一般令人有stereotype嘅感覺。整套戲有好幾個位令我睇到拿住拿住。

中國人傳統對婚姻嘅觀念、對子女嘅愛同照顧、導演對現今男女嘅感慨(包括感情同人生規劃)、社會對非傳統關係嘅睇法同變化,最後係個人嘅愛與欲嘅處理。

人生於世,活係一個群體社會裡面,有好多嘢唔係話想點就點,因為只要一日生活係呢個群體裡面,就會被迫要去跟隨一個”norm”,從外面睇,少不免會覺得好戇居,但係當你置身其中,呢種“選擇”卻又無可奈何。呢個算係“成熟”嘅表現嗎?愛與欲以外,有更大嘅係責任,呢啲係咪就係犧牲小我,完成大我?